ஆசிரியர் தகுதித்தேர்வில் தேர்ச்சி பெ2010 ஏப்ரல் 1-ந் தேதிக்கு பிறகு பணியில் சேர்ந்த ஆசிரியர்களுக்கு கால அவகாசம் தமிழக அரசு அறிவிப்பு

சென்னை, நவ.25-


கடந்த 2010 ஏப்ரல் 1-ந் தேதிக்குப் பிறகு அரசு பணியில் சேர்ந்த பட்டதாரி ஆசிரியர்கள் தகுதித்தேர்வில் தேர்ச்சி பெற 5 ஆண்டுகள் காலஅவகாசம் வழங்கப்படும் என்று தமிழக அரசு அறிவித்துள்ளது.



ஆசிரியர் தகுதித்தேர்வு


மத்திய அரசின் இலவச, கட்டாய கல்விச்சட்டம் 1.4.2010 முதல் அமலுக்கு வந்துள்ளது. இந்த சட்டத்தை தொடர்ந்து ஆசிரியர் நியமனம் தொடர்பாக தமிழக அரசு பல்வேறு விதிமுறைகளை கொண்டுவந்து இருக்கிறது. அதில் ஆசிரியர் தகுதித்தேர்வு முக்கிய அம்சம் ஆகும். அதன்படி, ஒன்றாம் வகுப்பு முதல் 8-ம் வகுப்பு வரை நியமிக்கப்படும் இடைநிலை ஆசிரியர்களுக்கும், பட்டதாரி ஆசிரியர்களுக்கும் ஆசிரியர் தகுதித்தேர்வு கட்டாயமாக்கப்பட்டு உள்ளது.


தேசிய ஆசிரியர் கல்வி கவுன்சில் (என்.சி.டி.இ.) வகுத்துள்ள விதிமுறைகளின்படி உருவாக்கப்படும் இந்த தகுதித்தேர்வை நடத்தும் பொறுப்பு ஆசிரியர் தேர்வு வாரியத்திடம் ஒப்படைக்கப்பட்டு உள்ளது. இடைநிலை ஆசிரியர் பணிக்கும், பட்டதாரி ஆசிரியர் பணிக்கும் தனித்தனியே தகுதித்தேர்வு நடத்தப்படும். இதில் 60 சதவீத மதிப்பெண் அதாவது, 90 மதிப்பெண்கள் (தேர்வுக்கான மொத்த மதிப்பெண்கள் 150) பெற்றால்தான் தகுதித்தேர்வில் தேர்ச்சி பெற்றதற்கான சான்றிதழ் வழங்கப்படும்.


ஏற்கனவே உள்ள ஆசிரியர்களுக்கு பொருந்துமா?


இந்த புதிய நடைமுறை ஏற்கனவே பணியில் உள்ள ஆசிரியர்களுக்கு பொருந்துமா? என்று கேள்வி ஆசிரியர்கள் மத்தியில் எழுந்துள்ளது. இதுதொடர்பான விளக்கம் பள்ளிக்கல்வித்துறை வெளியிட்டுள்ள அரசாணையில் தெளிவாக கூறப்பட்டு உள்ளது. அந்த உத்தரவில் கூறப்பட்டு இருப்பதாவது:-


இலவச கட்டாய கல்விச்சட்டம் 1.4.2010 முதல் நடைமுறைக்கு வந்துள்ளது. எனவே, 1.4.2010-க்குப் பிறகு அரசு பணியில் சேர்ந்துள்ள பட்டதாரி ஆசிரியர்கள் தகுதித்தேர்வு எழுதி 5 ஆண்டுகளுக்குள் தேர்ச்சி பெற்றுவிட வேண்டும். அதேபோல், தனியார் சுயநிதி பள்ளிகளில் பணியாற்றும் ஆசிரியர்களும் 5 ஆண்டுகளில் இந்த தகுதித்தேர்வில் தேர்ச்சி பெற வேண்டியது அவசியம். ஒரு நபர் எத்தனை முறை வேண்டுமானாலும் இந்த தேர்வை எழுதலாம். தகுதித்தேர்வில் பெற்றுள்ள மதிப்பெண்ணை அதிகரிக்க விரும்பினாலும் மீண்டும் தேர்வு எழுதி மதிப்பெண்ணை உயர்த்திக்கொள்ளலாம்.


நெகட்டிவ் மார்க் கிடையாது


மொத்தம் 150 கேள்விகள் கொண்ட இந்த தகுதித்தேர்வில் ஆப்ஜெக்டிவ் முறையில் அமைந்திருக்கும். அதாவது ஒரு வினாவுக்கு 4 பதில்கள் கொடுக்கப்பட்டிருக்கும். அதில் சரியான பதிலை தேர்வு செய்ய வேண்டும். தவறாக விடை அளித்தால் எவ்வித மைனஸ் மார்க் எதுவும் கிடையாது.


இவ்வாறு அந்த அரசாணையில் கூறப்பட்டு உள்ளது.


பட்டதாரி ஆசிரியர் பணிக்கு தகுதித்தேர்வு கொண்டுவரப்படுவதால் அரசு உதவி பெறும் பள்ளிகளில் பட்டதாரி ஆசிரியர் நியமனத்திற்கு தகுதித்தேர்வு தேர்ச்சி கட்டாயமாகும். இந்த தேர்வில் குறைந்தபட்சம் 60 சதவீத மதிப்பெண்கள் எடுத்து தேர்ச்சி பெற்றவர்களை மட்டுமே உதவி பெறும் பள்ளிகளிலும் பணியில் அமர்த்த முடியும் என்பது குறிப்பிடத்தக்கது.


கல்வியாளர்கள் வரவேற்பு


தற்போது கல்லூரிகளில் உதவி பேராசிரியர் பணியில் சேருவதற்கு யு.ஜி.சி. நடத்தும் தேசிய அளவிலான `நெட்' (நேஷனல் எலிஜிபிலிட்டி டெஸ்ட்) அல்லது மாநில அளவிலான `ஸ்லெட்' தகுதித்தேர்வு கட்டாயமாக்கப்பட்டு உள்ளது. பி.எச்டி. பட்டம் பெற்றவர்களுக்கு மட்டும் இதில் இருந்து விதிவிலக்கு அளிக்கப்பட்டு இருக்கிறது. கல்லூரி ஆசிரியர் பதவிக்கு இருப்பதைப் போன்று பள்ளி ஆசிரியர்களுக்கும் தகுதித்தேர்வு கொண்டு வந்திருப்பதை மாணவர்களின் பெற்றோர்கள், கல்வியாளர்கள், சமூக ஆர்வலர்கள் உள்பட அனைத்து தரப்பினரும் வரவேற்றுள்ளார்கள்.


இந்த புதிய திட்டம் அமல்படுத்தப்படுவதால் தகுதி படைத்த பி.எட். பட்டதாரிகள் மட்டுமே ஆசிரியர் பணியில் நுழைய முடியும். ``ஏதோ பி.எட். படித்தோம், வேலைவாய்ப்பு அலுவலகத்தில் பதிவுசெய்து வைத்தோம். என்றைக்காவது ஒருநாள் ஆசிரியர் வேலை கிடைக்கும்'' என்ற மனோபாவம் உள்ளவர்களுக்கு தகுதித்தேர்வு கிடுக்கிப்பிடி போட்டுள்ளது.

source : http://jobs-trb.blogspot.com/